Shqipëria fiton 2 me 0 ndaj Moldavisë, Edy Reja regjistron fitoren e parë

22:37 | 11 Qershor 2019
Arbresh Info

Edy Reja ka gjetur fitoren në takimin e dytë si trajner te kombëtarja shqiptare.

Shqipëria mposhti me rezultat 2 me 0 ekipin kombëtar të Moldavisë në takimin e zhvilluar si nikoqir në “Elbasan Arena” në kuadër të ndeshjeve kualifikuese për Kampionatin Evropian 2020, shkruan portali arbresh.info.

Kuqezinjtë shënuan golin e epërsisë pas një aksioni të organizuar mirë, por prekja e fundit u bë nga Sokol Cikalleshi.

Myrto Uzini dërgoi në zonë bukur topin para se Odise Roshi të asistonte te Cikalleshi që shënoi për 1 me 0 në minutën e 65′.

Roshi ishte asistues edhe në golin dytë të shënuar në minutat shtesë të takimit nga Ylber Ramadani për 2 me 0.

Shqipëria pas katër ndeshjeve në kuadër të Grupit H gjendet në pozitën e katërt me gjashtë pikë, tri më pak se Islanda, Turqia dhe Franca në pozitat më lartë./arbresh.info/